Македонија ја зајакнува својата позиција на регионалната енергетска карта, користејќи ја стратешката географска положба и поврзаноста со Коридорите 8 и 10, соопштува ВМРО-ДПМНЕ.
Од партијата наведуваат дека преку нови и постојни електроенергетски врски со соседните земји се создаваат услови за посигурен пренос и поголема стабилност на електроенергетскиот систем.
Како еден од клучните проекти го посочуваат интерконективниот далновод Битола–Елбасан, кој заедно со врските со Бугарија, Србија, Косово и Грција треба дополнително да ја поврзе земјата со регионалните енергетски пазари.
Во гасниот сектор, во завршна фаза е интерконекторот со Грција, проект вреден околу 60 милиони евра. Почетниот капацитет ќе изнесува 1,5 милијарди кубни метри годишно, со можност тој да биде зголемен до три милијарди кубни метри.
Според ВМРО-ДПМНЕ, двонасочната гасна врска ќе овозможи пристап до повеќе извори на природен гас, поголема сигурност во снабдувањето и поголема конкуренција на пазарот. Од партијата очекуваат придобивки и за домаќинствата и за индустријата, како и подобри услови за економски развој.
Како следен значаен проект се најавува гасното поврзување со Србија. Северниот интерконектор би овозможил Македонија да стане транзитна рута за гасот што пристигнува од југ, вклучително и преку терминалот во Александрополис, кон земјите од Централна Европа.
Од ВМРО-ДПМНЕ посочуваат дека развојот на енергетската инфраструктура е важен и за привлекување нови инвестиции, особено во индустриите со висока потрошувачка на енергија, но и за идниот развој на дата-центри и технологии поврзани со вештачката интелигенција.
Паралелно се работи и на други енергетски проекти, меѓу кои ставањето во функција на продуктоводот од Солун до ОКТА, рестартирањето на гасоводот Велес–Штип, развојот на делницата Гостивар–Кичево и продолжувањето на гасоводната мрежа од Тетово кон Косово.
Од партијата велат дека крајната цел е Македонија да не биде само крајна точка на енергетските мрежи, туку активен дел од регионалниот систем и важен енергетски центар на Балканот.
Според нив, поголемата поврзаност, повеќето извори на енергија и можностите за транзит треба да донесат поголема енергетска сигурност, подобри услови за инвестиции и посилна економија.