Општина Центар воведува нова дигитална алатка за граѓаните – официјална мобилна апликација преку која на едно место се обединети информациите, услугите и контактите на Општината.
Апликацијата засега е достапна за корисниците на iOS преку App Store, додека верзијата за Android се очекува да биде достапна преку Google Play во наредните денови.
Корисниците преку апликацијата ќе можат да ги следат општинските вести, известувања, настани и јавни повици, но и директно да користат дел од електронските услуги.
Достапни се и брзи врски до ГИС Порталот, е-Урбанизам, е-Дозволи и „Мој Буџет“, како и до општинските услуги подредени по категории. На едно место се поставени и документи, обрасци, одлуки и контакт-податоци за Општината.
Апликацијата овозможува и директна комуникација со граѓаните. Тие ќе можат преку неа да пријават проблеми или да испратат предлози до Општината, а достапни се и информации за пријавување корупција, отворени податоци и пристап до информации од јавен карактер.
Градоначалникот Горан Герасимовски вели дека целта е граѓаните полесно и побрзо да стигнуваат до услугите и информациите, без потреба да пребаруваат на повеќе места или лично да ја посетуваат Општината.
Апликацијата е наменета за жителите на Центар, но и за сите граѓани кои работат, престојуваат или секојдневно се движат низ централното градско подрачје.