За православните христијани денеска започнува Богородичниот, односно Успенскиот пост, посветен на Успението на Пресвета Богородица. Постот трае 15 дена и завршува на 28 август, кога се празнува големиот христијански празник Успение на Пресвета Богородица, во народот познат како Голема Богородица.
Богородичниот пост е востановен како период на молитвено сеќавање и духовна подготовка за празникот посветен на Божјата Мајка, со посебен акцент на молитвата и барањето на нејзиното застапништво.
Овој пост е најкраток од четирите повеќедневни пости во годината. Започнува на 14 август, на празникот на Светите седум Макавеи, а завршува на празникот Успение на Пресвета Богородица, на 28 август.
Сведоштва за Богородичниот пост се среќаваат уште во списите на Теодор Студит од IX век, додека неговото празнување и постење во овој период било конечно утврдено на Цариградскиот собор во 1166 година.
Според црковниот типик, Богородичниот пост е построг од Петровденскиот и Божикниот пост, но не е толку строг како Великиот пост. Од понеделник до петок се препорачува храна без масло, додека во саботите и неделите се дозволуваат вино и масло. На празникот Преображение Господово, на 19 август, дозволена е риба.
Покрај телесното воздржување, Црквата особено го нагласува духовниот пост – одрекување од грешни мисли, желби и дела, како и посветување на молитвата, покајанието, љубовта, смирението и простувањето. Во овој период верниците се повикуваат и на исповед и причест.
Празникот Успение на Пресвета Богородица – Голема Богородица, кој се одбележува на 28 август, е неработен ден за граѓаните од православна вероисповед во Северна Македонија.