Концертот на српската пејачка Јелена Карлеуша, кој требаше да се одржи на 15 август во познатиот клуб во Водице, Хрватска, е официјално откажан.
Информацијата преку својот официјален Инстаграм профил ја потврди самиот клуб.
Откако најавата за концертот предизвика реакции кои далеку ги надминаа границите на музички настан во приватен клуб, донесовме одлука да не го одржиме концертот – објави Хациенда.
Од раководството на клубот нагласија дека приоритет им е безбедноста на сите присутни.
Ниеден изведувач и ниеден настан не се поважни од безбедноста на нашите гости и вработени – се наведува во официјалното соопштение на клубот.
Истовремено, од клубот им се заблагодарија на гостите за поддршката и разбирањето, порачувајќи дека нивниот простор „останува место за музика, забава и добро поминување на времето“.
Најавата за настапот на Карлеуша предизвика бројни негативни реакции изминатите денови, при што дел од граѓаните и здруженијата на ветерани ја критикуваа нејзината посета поради претходни политички изјави.
По повод настанот претходно се огласи и градоначалникот на Водице, Анте Цукров, кој изјави дека го смета настапот за несоодветен и дека пејачката не е добредојдена во градот.