Опозициската СДСМ и нејзиниот лидер Венко Филипче се обидуваат да дојдат до политички поени преку глумење жртви во врска со настаните во Ново Село, изјави денеска портпаролот на ВМРО-ДПМНЕ, Валентин Манасиевски.
Според ВМРО-ДПМНЕ, лицата инволвирани во инцидентот биле испратени директно со цел да предизвикаат провокација на местото каде што присуствувал претседателот на Владата, Христијан Мицкоски.
Од владејачката партија тврдат дека станува збор за лица со претходни кривични досиеја кои веќе имаат условни затворски казни.
„Тие се искусни насилници и тепачи, а доказот е тоа што и двајцата се условно осудени на година и пол затвор, затоа што крвнички тепаа туристи во Струмица. Затоа Филипче ги одбрал токму нив. Внуци на Заеви, тепачи, насилници и наркомани. Таа е матрицата на СДС, а таа никако не смее да биде иднината на Македонија“, изјави Манасиевски.