Министерството за внатрешни работи на Албанија прогласи двајца државјани на Македонија за „персона нон грата“, поради сомнителни активности насочени против албанската држава.
Информацијата првично ја објави албанскиот медиум „Топ ченел“, а ја пренесе ТВ21.
Според извори од полицијата, станува збор за лицата Валон Беља (Ваљон Бела) и Бекир Халими, двајцата со македонско државјанство.
Одлуката за нивно прогласување за непожелни лица била донесена по официјален предлог на Антитерористичката единица во склоп на албанската Државна полиција.
Извори на новинарката Анила Хоџа посочуваат дека против овие две лица постојат докази за активности кои се штетни за националната безбедност и државата Албанија.
Официјална потврда за изречената мерка пристигна и од албанското Министерство за внатрешни работи.