Силно невреме следено со бурен ветер, обилни врнежи и грмотевици го погоди источниот дел на Германија, при што 28-годишен маж го загуби животот откако врз него паднало дрво.
Трагичниот инцидент се случил во градот Ратен, во германската покраина Саксонија, во близина на познатиот театар на отворено „Фелзенбајне Ратен“.
Според информациите од германската полиција, младиот маж се здобил со тешки повреди од падот на дрвото и починал на самото место.
Полициските екипи веднаш го обезбедиле теренот, додека истражните органи ги утврдуваат сите детали и околности под кои се случила несреќата.
Невремето пристигна непосредно по неколкудневниот топлотен бран, каде во делови од Саксонија беа измерени температури и до 38 степени Целзиусови.
Германската метеоролошка служба претходно издаде предупредувања за силни грмотевици, град и налети на урагански ветер со брзина од 90 до 120 километри на час.
Метеоролозите исто така предупредија на опасност од поројни дождови со над 30 литри на метар квадратен и можни паѓања на дрвја.
Засега нема официјални податоци за други евентуално повредени лица или за висината на материјалната штета предизвикана од бурата во оваа покраина.