Во Основниот кривичен суд, во судницата во затворот „Идризово“, денеска продолжува судскиот процес за трагичниот пожар во дискотеката „Пулс“ во Кочани, во кој животот го загубија 63 лица, а повеќе од 200 беа повредени.
На денешното рочиште се очекува Обвинителството да продолжи со изведување на материјалните докази. Според најавите, ќе бидат презентирани листинзи од телефонските комуникации, по што од доказната постапка на обвинителството ќе останат уште градежното вештачење и сослушувањето на вештите лица.
На претходното рочиште беа презентирани бројни документи, меѓу кои записници од претреси, потврди за привремено одземени предмети, извештаи и службени дописи од Министерството за внатрешни работи и СВР Штип, како и документација од Државниот пазарен инспекторат, поврзана со инспекциски контроли и работењето на правните субјекти „Класик ДМ“ и „ММММ Кафе“.
Пред почетокот на изведувањето на доказите, јавната обвинителка Наташа Сарамандова истакна дека станува збор за исклучително сложен предмет со обемна доказна постапка, насочена кон целосно расветлување на околностите што довеле до една од најголемите трагедии во поновата македонска историја.
Таа посочи дека, доколку законските одредби го дозволувале тоа во оваа фаза од постапката, обвинителството веќе би одговорило на дел од прашањата и забелешките на одбраната во врска со одговорноста и улогата на обвинетите. Според Сарамандова, тие прашања ќе бидат детално образложени во завршните зборови.
По завршувањето на доказната постапка на Обвинителството, свои материјални докази, сведоци и две вештачења ќе предложи и одбраната.
Судскиот процес го води судијката Дијана Груевска-Илиевска, додека обвинението го застапува тим од 15 јавни обвинители.
Пожарот во дискотеката „Пулс“ избувна на 16 март 2025 година за време на настап на музичката група ДНК. Во несреќата загинаа 63 лица, а повеќе од 200 беа повредени, што ја прави една од најтешките трагедии во поновата историја на државата.