Рускиот претседател Владимир Путин остварил телефонски разговор со својот американски колега Доналд Трамп по повод 250-годишнината од независноста на САД. Од Кремљ соопштија дека двајцата лидери разговарале за ситуацијата во Украина, а овој значаен разговор доаѓа непосредно пред одржувањето на Самитот на НАТО во Анкара.
Разговорот кој траел еден час и 25 минути, според руските медиуми, бил фокусиран на можностите за прекин на воените дејствија, особено во пресрет на претстојните сојузнички средби во Турција.
„Претседателите природно го допреа прашањето за решавање на конфликтот во Украина, земајќи го предвид претстојното учество на Доналд Трамп на самитот на НАТО во Турција на 7 и 8 јули“, изјави дипломатскиот советник на Кремљ, Јуриј Ушаков.
Според неговите зборови, американскиот претседател уште еднаш ја потврдил својата подготвеност да работи на брзо завршување на борбите и наоѓање решение за надминување на кризата. Воедно, советникот Ушаков додаде дека и Русија се стреми кон „политичко-дипломатско решение на конфликтот“.
Освен за украинската криза, Путин и Трамп во долгиот телефонски разговор размениле мислења и за други горливи меѓународни теми, ставајќи посебен акцент на актуелната ситуација околу Иран и случувањата на Блискиот Исток.