Жена била нападната од отровната риба-зајак, во јавноста позната и како лагокефалос, додека влегувала во морето на плажа во популарното грчко туристичко место Пефкохори на Халкидики.
Повредената жена за грчката телевизија „АНТ1“ појаснила дека инцидентот се случил во плитките делови од водата, додека била во друштво со своите пријатели.
„Реков: ‘Нешто ме гризе и не ме пушта’. Погледнав надолу и видов огромна риба. Знаев како изгледа лагокефалосот, бидејќи претходно бев информирана. Сфатив дека е тоа, се исплашив и почнав да ја тресам ногата за да се ослободам, бидејќи ме касна и не ме пушташе. Веднаш излегов од морето, бев во паника и почнав да плачам“, раскажала жената.
Според нејзиното сведоштво, сериозноста на повредата не е поголема благодарение на позицијата каде што рибата го извршила каснувањето.
„За среќа, ме касна точно преку коската на глуждот, па забите не успеаја да навлезат подлабоко во ткивото. Сепак, ми остави голема и видлива рана“, изјавила повредената жена.
Веднаш по настанот, присутните капачи на плажата реагирале брзо, ѝ укажале прва помош на жената и успеале да го запрат обилното крварење на ногата.
Таа итно била пренесена во локалниот здравствен центар во регионот, каде дежурните медицински екипи ја исчистиле раната, по што ѝ била препишана антибиотска терапија и примила серум против тетанус.