Во парламентарна процедура во Црна Гора е доставен предлог за измени на Законот за работни односи со кој се предлага воведување право на продолжен викенд еднаш месечно за вработените.
Новото законско решение веќе се наоѓа пред пратениците и предизвика голем интерес во јавноста.
Предлогот, поднесен од Клубот на пратеници на Демократска Црна Гора, предвидува работниците да имаат слободен петок пред последниот викенд во месецот. Со тоа, петочниот одмор би се поврзал со сабота и недела, создавајќи продолжен викенд еднаш во текот на секој месец.
Предлагачите точно ги дефинираа измените преку внесување на нова регулатива во постоечкиот законски акт.
Со измените се предлага додавање нов член 76а во Законот за работни односи, насловен „Продолжен викенд еднаш месечно“. Според предложеното решение, вработениот би имал право на неработен петок или 24-часовен одмор кој ќе се користи во петок, заедно со редовниот период на одмор предвиден со законот.
Од Демократска Црна Гора оценуваат дека оваа мерка претставува чекор кон подобрување на работничките права и создавање подобар баланс меѓу професионалниот и приватниот живот.
Според предлагачите, дополнителниот ден одмор би придонел за намалување на стресот, подобрување на психофизичкото здравје на вработените, зголемување на мотивацијата и поголема ефикасност на работното место.
Дополнително, тие сметаат дека продолжениот викенд би имал и пошироки општествени и економски ефекти од зајакнување на семејните односи и поголемо учество во културни и спортски активности, до поттикнување на домашниот туризам и локалната економија.
Пратениците наведуваат дека решението е јасно дефинирано и предвидливо, што ќе им овозможи на работодавачите навремено да ги организираат работните процеси и да ги усогласат деловните обврски.