Економски колапс, тешка политичка изолација и континуирано лажење на граѓаните е билансот по навршувањето на две години од владеењето на Христијан Мицкоски, обвинуваат утринава од опозициската СДСМ.
Македонската економија во моментов се наоѓа во длабока криза, додека државниот буџет е практично пред колапс поради лошите менаџерски политики.
Од Бихаќка алармираат дека до јуни е потрошен скоро целиот планиран дефицит за целата 2026 година во износ од 670 милиони евра, поради што ребалансот ќе биде неизбежен и исклучително тежок.
Опозицијата тврди дека странските инвестиции во земјава драматично паднале за дури 60 отсто, додека јавниот долг е енормно зголемен за над 2,5 милијарди евра за само две години власт на ВМРО-ДПМНЕ.
Дополнително, од партијата посочуваат дека економскиот раст е вештачки и базиран исклучиво на лична потрошувачка, а не на производство и извоз, што директно ја зголемува инфлацијата во државата.
Интегралното соопштение од Центарот за комуникации со јавноста на СДСМ ви го пренесуваме во продолжение, прецизно по пасуси:
„Навршуваат две години од владеењето на Христијан Мицкоски и организирана криминална група ВМРО. Она што граѓаните го добија не е подобар живот, туку економски колапс, политичка изолација и континуирано лажење.
Економијата е во длабока криза, по две години власт, буџетот е практично пред колапс. До јуни е потрошен скоро целиот планиран дефицит за целата 2026 година, од 670 милиони евра. Ребалансот е неизбежен и ќе биде многу тежок.
Капиталните инвестиции покажуваат бројки на хартија, но во реалноста се работи за проекти од времето на СДСМ, а не за нови проекти. Нема соодветен раст и базиран е исклучиво на лична потрошувачка, а не на производство и извоз, модел кој е неодржлив и директно ја зголемува инфлацијата.
Мицкоски ветуваше подобрување на животниот стандард, повисоки плати и подобар живот. Наместо тоа, граѓаните добија „маратон во сиромаштија“.
Владата отворено кажува дека нема пари за поголема минималната плата, за повисоки плати, за пензии и за поддршка на земјоделците и младите, но во исто време има пари за луксуз и за нови задолжувања. За две години, странските инвестиции паднаа за 60 отсто, а јавниот долг е зголемен за над 2,5 милијарди евра. Економијата стагнира, а граѓаните се посиромашни.
Истовремено, Македонија е во найдлабока политичка изолација во последните 20 години. Мицкоски го користи идентитетот како алиби за блокада на европскиот пат, без да понуди ниту план, ниту стратегија. Наместо реформи и напредок, граѓаните добиваат празни фрази и националистички спинови.
Две години на ВМРО-ОКГ се две години на економски неуспех, лажни ветувања и политичка изолација. Наместо подобар живот, граѓаните добија сиромаштија, несигурност и изгубена европска перспектива.
Владата на Мицкоски не решава проблеми, таа ги создава и ги продлабочува, а граѓаните се тие кои ја плаќаат највисока цена, која, како што вели Мицкоски, ќе трае со децении ако тие останат на власт.“