Семејството на легендарниот фудбалер Лионел Меси излезе со официјално соопштение во јавноста во кое ја објаснува здравствената состојба на неговиот татко, Хорхе Меси.
Оваа реакција доаѓа по првиот натпревар на Меси на Светското првенство против Алжир, каде што тој постигна три гола и се изедначи со Мирослав Клозе на првото место со 16 голови.
Иако во медиумите се сметаше дека неговите солзи во еден момент од натпреварот беа поради уривањето на историскиот рекорд, вистинската причина е загриженоста за здравјето на неговиот татко.
Поради големиот број дебати и гласините во јавноста, семејството Меси испрати официјално соопштение со цел да се сопре неодговорното медиумско известување.
„Во моментов тој е под медицински надзор, се опоравува и бележи поволен напредок во рамките на состојбата низ која минува. Во светлината на извештаите, гласините и шпекулациите што се појавија во последните часови, семејството сака да ја изрази својата длабока загриженост поради недостатокот на чувствителност, почит и дискреција со која некои поединци пристапија кон она што е исклучиво приватна семејна работа“, се вели во првиот дел од соопштението.
Понатаму, тие потенцираат дека дезинформациите не треба да се сметаат за точни и апелираат на разумност од поединците.
„Семејството, исто така, сака да нагласи дека само најблиските членови на семејството имаат точни и проверени информации за состојбата на Хорхе. Затоа, секоја верзија, изјава или информација што не доаѓа директно од семејството и неговите официјални канали не треба да се смета за валидна или вистинита. Во вакви времиња, бараме одговорност, разумност и човечност. Здравјето на една личност и мирот на неговите најблиски не треба да бидат предмет на шпекулации или неодговорно медиумско известување“, се додава во изјавата.
На крајот, најблиските на фудбалерот упатија благодарност до сите кои искрено нудат поддршка во овој специфичен период.
„Искрено ви благодариме за изразите на поддршка, почит и загриженост што ги добивме и бараме приватноста, доверливоста и личниот простор на Хорхе, како и на целото негово семејство, да бидат почитувани за време на овој процес. Сите релевантни информации ќе бидат навремено доставени од страна на семејството преку соодветните канали. Ви благодариме за разбирањето“, порачуваат од семејството Меси.