Собранието ги усвои предложените измени и дополнувања на Стратегијата за регионален развој за периодот 2021–2031 година, со што се обезбедува нејзино усогласување со актуелните демографски и развојни состојби во државата, како и со Националната развојна стратегија 2024–2044, информираат од Министерството за локална самоуправа.
Министерот Златко Перински, пред Комисијата за локална самоуправа и Законодавно-правната комисија, во своето излагање истакна дека целта на измените е Стратегијата да стане пооперативна, пофункционална и поефикасна алатка за постигнување на стратешките цели, преку поддршка на полицентричен развој и намалување на регионалните диспаритети.
Стратегијата за регионален развој претставува основен долгорочен плански документ со кој се утврдуваат принципите, стратешките цели и приоритетите на политиката за рамномерен регионален развој, како и мерките, инструментите и финансиските механизми за нивна реализација.
Согласно Законот за рамномерен регионален развој, на средината од периодот на спроведување се врши тековно оценување со цел да се согледаат постигнатите резултати, предизвиците во имплементацијата и потребата од прилагодување на предвидените мерки.
Предложените измени се темелат на наодите од спроведеното оценување и имаат за цел да ја зголемат применливоста и ефикасноста на Стратегијата. Во рамки на ревизијата се направени интервенции во делови каде мерките се покажале како тешко спроведливи, се обезбедува поголема усогласеност со идните развојни политики и се воведуваат нови мерки во области каде е утврдена потреба од дополнителни активности.
Дополнително, со измените се врши усогласување со резултатите од Пописот на населението од 2021 година, со што новата демографска слика се интегрира во процесот на планирање и спроведување на политиките за рамномерен регионален развој.
Измените и дополнувањата се резултат на сеопфатен консултативен процес во кој беа вклучени надлежните институции и релевантните чинители кои учествуваат во нејзината имплементација.