Српскиот претседател Александар Вучиќ денеска остро ги демантираше наводите на контроверзниот бизнисмен Ранко Мимовиќ дека до неговиот кабинет била доставена официјална понуда за преземање на рускиот капитал во Нафтената индустрија на Србија (НИС). Коментирајќи ги пишувањата на „Ројтерс“, Вучиќ истакна дека државата нема намера да дозволи стратешки ресурси да паднат во несигурни раце.
„Тоа е таква игра која нема да помине кај нас. Слушајте, нашол некој две милијарди, па српска фирма ќе купувала НИС. Сериозни сте? Е, не можеш да купиш. Не дава Србија! Или ќе дојде некој што знае како се управува со такви претпријатија на сериозен и одговорен начин, или довидување на сите“, изјави Вучиќ.
Претседателот откри дека во моментов се водат сериозни разговори со унгарската енергетска компанија МОЛ. Тој потсети дека рокот даден од американската Канцеларија за контрола на странски средства (ОФАК) за завршување на преговорите за купување на рускиот капитал во НИС истекува на 22 мај.
Според Вучиќ, во преговорите со унгарската страна постојат „четири или пет спорни точки“, но тој изрази оптимизам дека ќе се постигне компромис меѓу Србија, Унгарија и Русија. Крајното решение за сопственоста на НИС се очекува да биде објавено во текот на следната недела.