Амбасадорот на Шведска, Ола Сулстром, од денеска ја започнува иницијативата „Амбасада на турнеја“, во чии рамки до 9 мај ќе ги посети поголемите градови низ целата територија на Македонија. Целта на посетата е одбележување на долгогодишните партнерства и зајакнување на врските помеѓу двете земји.
Како што информираат од Амбасадата, посебен акцент ќе биде ставен на шведските инвестиции, резултатите од реформската соработка и културните врски. Турнејата почнува утрово од Скопје, а ќе ги опфати Тетово, Гостивар, Охрид, Струга, Битола, Прилеп, Велес, Штип, Струмица и Куманово.
„Турнејата почнува во Скопје, каде амбасадорот ќе ја посети улицата ’Стокхолмска‘, именувана во знак на благодарност за поддршката на Шведска по земјотресот во 1963 година, како и Домот за стари лица ’Мајка Тереза‘, изграден со шведска помош. Програмата вклучува и средби со големи и мали шведски компании кои работат во Северна Македонија“, наведуваат од Амбасадата.
Во рамките на активноста, предвидени се средби со локалните власти, граѓански организации и претприемачи. Во Битола ќе се одржи Бизнис форум, додека во Охрид и Струга фокусот ќе биде ставен на екологијата и одржливоста.
Целата иницијатива ќе заврши на 9 мај во Скопје, на Денот на Европа. Од Амбасадата додаваат дека иницијативата #EmbassyOnTheRoad е потврда за шведската поддршка на македонскиот пат кон Европската Унија.