Двајца британски државјани со еврејско потекло, на возраст од 34 и 74 години, се избодени со нож во предградието Голдерс Грин во северниот дел на Лондон. Метрополитен полицијата и официјално го квалификуваше инцидентот како терористички напад, а истрагата треба да утврди дали цел била конкретно еврејската заедница.
Напаѓачот, 45-годишен маж со историја на насилство и ментални проблеми, е уапсен откако се обидел да ги нападне и полицајците кои интервенирале. Тој бил совладан со помош на електрошок, откако првично постоел сомнеж дека носи експлозивна направа. Жртвите се пренесени во болница и се наоѓаат во стабилна состојба.
Шефот на антитерористичката полиција, Лоренс Тејлор, потврди дека истрагата се води во соработка со безбедносните служби.
– Нападот сега формално е прогласен за терористички инцидент. Нашите високо специјализирани полициски тимови работат со Метрополитенската полиција за брзо да се продолжи со оваа истрага и да се утврди што точно се случило. Исто така работиме со нашите партнери од безбедносните служби за да обезбедиме целосна разузнавачка слика, а една од насоките на истрагата е дали овој напад намерно бил насочен кон еврејската заедница во Лондон – изјави Тејлор.
Поради сериозноста на настанот, британскиот премиер Кир Стармер свика итен состанок на Комитетот за одговор при вонредни ситуации (КОБРА).