Албанскиот Институт за статистика (ИНСТАТ) ги објави најновите податоци за криминалитетот за 2025 година, кои укажуваат на значително влошување на безбедносната состојба и зголемување на сите главни индикатори во споредба со претходната година.
Според извештајот пренесен од агенцијата АТА, минатата година во Албанија биле регистрирани вкупно 38.345 кривични дела, што претставува висок скок од 17,4 отсто во однос на 2024 година. Овој негативен тренд е проследен и со раст на бројот на осомничени сторители, кој достигнал 45.334 лица (зголемување од 13,2 отсто). Демографската слика на сторителите покажува дека огромно мнозинство, односно 93,3 отсто се мажи, а најзастапената возрасна група е од 30 до 44 години.
Она што особено загрижува во извештајот на ИНСТАТ е големиот број на лица кои за првпат влегле во криминалните води. Од вкупниот број сторители, дури 39.027 лица за првпат се огрешиле пред законот, што е скок од 16,7 отсто во споредба со претходната година.
Паралелно со општиот криминалитет, забележан е раст и кај актите на насилство за 7,8 отсто, достигнувајќи бројка од 19.145 случаи. Во оваа категорија, 39,3 отсто се однесуваат на кривични дела против личноста. Жените се жртви во 36,7 отсто од овие случаи, и тоа најчесто при сексуални кривични дела, дела против моралот и достоинството, како и при семејно насилство.
И покрај значителниот раст на криминалот, затворската популација бележи само минимална промена. Статистиката потврдува дека во казнено-поправните установи во Албанија казна издржуваат 4.503 лица, што е благо зголемување од само 0,3 отсто во споредба со 2024 година.