Црногорската јавност е потресена од тројното убиство што се случило во подгоричката населба Стар Аеродром. Полицијата потврди дека во изнајмен стан се пронајдени три безживотни тела на машки лица. Според првичните информации, меѓу убиените се браќата од Рожаје, 28-годишниот Денис Хот и 27-годишниот Незрин Хот.
Истражните органи интензивно трагаат по Вехид Муриќ од Рожаје, кој е првоосомничен за овој грозоморен чин. Според полициските соопштенија, жртвите и осомничениот биле пријатели кои заедно престојувале во Подгорица поради работа на градилиште. Се верува дека убиството, извршено со ладно оружје, е резултат на лични расправии, а не на пресметка меѓу криминални групи.
Истрагата откри дека злосторството е откриено откако осомничениот, веднаш по убиството, заминал во својот роден град, Рожаје. Таму, наводно, извршил насилство врз сопствената мајка, по што семејството случајот го пријавило во полиција. Токму таа пријава ги насочила истражителите кон откривањето на тројното убиство во Подгорица.
Полициските служби продолжуваат со потрагата по осомничениот и со целосно расветлување на околностите под кои дошло до оваа семејна трагедија.