Македонските возачи кои летово планираат да патуваат кон Грција мора сериозно да го проверат опремувањето на своите автомобили. Со стапувањето во сила на новиот Закон за сообраќај, нашиот јужен сосед воведува радикални измени и строги правила, чие непочитување ќе ве чини скапо.
Најголема промена е воведувањето на нов стандард за прва помош (DIN 13164:2022). Доколку вашиот сет не е во согласност со овој нов стандард, се соочувате со казна од 30 евра. Новиот комплет, кој мора да содржи 16 клучни артикли (вклучувајќи термо-ќебе, специјални облоги за изгореници и заштитни маски), чини околу 31 евро, што е значително поскапо од досегашните комплети.
Според грчка „Прототема“, сообраќајните правила дополнително се заоструваат:
Досегашното ограничување во населени места од 50 км/час е драстично намалено на само 30 км/час.
За да избегнете непријатности на одмор, проверете дали во возилото ги имате и останатите задолжителни предмети: противпожарен апарат, триаголник, рефлектирачки елек и резервна гума.