Родителите на децата кои го загубија животот во катастрофалниот пожар во дискотеката „Пулс“ во Кочани, денеска одржаа средба со директорот на Институтот за судска медицина, Александар Станков. Главна тема на разговор беа токсиколошките анализи, за кои семејствата со месеци бараат одговори.
Директорот Станков по средбата изјави дека Институтот ја завршил целата своја работа и дека сите докази се веќе предадени во Обвинителството. „Објаснето им е сè што треба досега. Сите наоди ќе бидат јавно презентирани во текот на судската постапка“, истакна Станков.
Александар Наунов, татко на починатата Надица и претседател на здружението „16 март 2025 Кочани“, изрази умерена доверба во Институтот, нагласувајќи дека родителите со нетрпение го чекаат рочиштето за конечно да ја дознаат вистината за причините за смртта на нивните деца.