Првата детска амбасада во светот „Меѓаши“ денеска во Кинотеката на Македонија ќе го промовира краткиот документарен филм „Гласна тишина“, по повод 15-годишнината од програмата за мировно образование.
Документарниот филм ја прикажува трансформативната улога на програмата – од нејзините почетоци до сегашните достигнувања, нагласувајќи ја важноста на мировното образование како алатка за градење ненасилна комуникација, доверба и инклузивни заедници. Преку сведоштва на ученици, наставници и реализатори, филмот испраќа порака дека мирот е активен и секојдневен избор, соопшти „Меѓаши“.
По проекцијата на „Гласна тишина“ ќе следува дискусија.