Полициски службеници од повеќе сектори за внатрешни работи изминативе два дена спроведоа низа превентивни и едукативни активности низ целата држава, опфаќајќи три клучни општествени проблеми: родово базираното насилство, безбедноста во сообраќајот и зависностите кај младите.
Под мотото „Не биди нем сведок”, полицијата реализираше средби со граѓани со цел спречување на семејното насилство. Вакви активности беа спроведени во велешко (селата Извор, Владиловци и Јасеново во општина Чашка), како и во Скопје, Крива Паланка, Пробиштип и Берово. На граѓаните им беа објаснети постапките за пријавување насилство, како и достапноста на институционалните услуги за помош и привремен престој на жртвите. Апелот до јавноста е јасен – никој не смее да молчи доколку е сведок на насилство.
Паралелно со ова, во Скопје и Велес се спроведоа сообраќајните кампањи „Не користи мобилен телефон” и „Стави појас”. Полициските службеници директно на терен ги едуцираа возачите и сопатниците за ризиците од користењето телефон зад воланот и за законската обврска за врзување појас, делејќи им печатен едукативен материјал за подигнување на сообраќајната култура.
Полицијата не ги заборави ниту најмладите. Во соработка со Црвениот крст од Крива Паланка, службеници од Регионалниот центар за гранични работи Исток одржаа предавање во основното училиште „Јоаким Крчовски”, фокусирајќи се на превенција од зависности од дрога, алкохол и цигари кај учениците.