Собранието денеска треба да ја одржи 94. седница, на која главна точка е изборот на нов државен јавен обвинител. Предлогот е Ненад Савески, актуелен судија во Основниот кривичен суд Скопје, номиниран од Владата на 10 март. За изборот му се потребни најмалку 61 пратенички глас. Кандидатурата доаѓа по оставката на Љупчо Коцевски, по постапка во која учествуваа пет кандидати.
Савески е роден 1976 година, живее во Гостивар и е магистер по казнено право. Дипломирал и магистрирал на Правниот факултет „Јустинијан Први“ при УКИМ, а правосудниот испит го положил во 2003 година. Од 2016 година е судија во одделот за организиран криминал и корупција при Основниот кривичен суд Скопје. Има искуство како експерт во проекти на ОБСЕ, Советот на Европа и УСАИД, како и учество во Националната конвенција за ЕУ (Поглавје 23).
Активен е во работни групи за судски реформи и е предавач во Академијата за судии и јавни обвинители, како и обучувач во програмата HELP на Советот на Европа. Автор и коавтор е на повеќе стручни трудови и публикации. Зборува повеќе јазици, меѓу кои англиски и германски.
На седницата е предвиден и избор на член на Судскиот совет, при што предложени кандидати се Сејфула Османи и Арбер Исаку.
Пратениците ќе разгледаат и предлог-измени на Законот за пензиско и инвалидско осигурување, како и законски измени поврзани со инфраструктурните проекти на коридорите 8 и 10-д, по скратена постапка.
Можно е на дневен ред да се најде и предлогот Ацо Ристов да биде избран за претседател на Регулаторната комисија за енергетика, по оставката на Марко Бислимоски. Ристов е дипломиран електроинженер со долгогодишно искуство во енергетиката и претходно работел и во правосудниот сектор.