Хрватскиот претседател Зоран Милановиќ, по отворањето на првиот меморијален шаховски турнир „Сањин Шпановиќ“ во Загреб, одговараше на новинарски прашања, при што упати остри пораки кон државниот врв на соседна Србија. Како што пренесува N1, Милановиќ директно ги коментираше информациите за новото вооружување на Србија, не криејќи ја својата загриженост.
„Набавка на ракети? Тоа е нивна суверена одлука. Морам да признаам дека не знам што сакаат да постигнат со тој вид вооружување. Трошат многу. Не дај Боже од каде доаѓаат сите тие средства и дали сè е платено. Факт е дека Кина им продаде нешто. Зошто Србија го прави ова – до одреден степен разбирам дека сакаат да имаат силна одбрана, но се снабдуваат и со офанзивно оружје. И тоа ме загрижува, но од друга страна, Хрватска е во НАТО и во Европската Унија“, изјави Милановиќ пред новинарите.
Во продолжение, тој директно се осврна на неодамнешните изјави на српскиот претседател Александар Вучиќ, кој обвини дека се подготвува регионален заговор против Србија. Милановиќ ваквите тврдења ги нарече „необични“ и „луди“.
„Веќе го предупредив еднаш дека ниеден меморандум на Хрватска, Албанија и Косово за соработка во областа на армијата потпишан од министерот не е никаков вид воен сојуз. Еве го пред два дена зборува за план на Хрватска, Косово и Албанија за напад врз Србија. Тој е доста интересен човек. Како да нападнеме? Со што? Немаме армија за тоа. Тогаш можете да ми верувате на збор, на крајот на краиштата, јас одлучувам за тоа. Тоа не е добро да се чуе, покрај тоа е лудо“, заклучи хрватскиот претседател.