Општина Струга информира дека на 16 овој месец ќе се одржи аукција за продажба на автомобилот Ауди А6, со почетна цена од 1.344.636 денари, односно околу 21.800 евра.
Аукцијата, според општинската прес-служба, ќе започне во 10 часот на интернет-страницата e-stvari.mk.
„Со средствата од продажбата на автомобилот ќе се набави комбе кое ќе служи за потребите на општинската администрација и спортските клубови во градот“, се наведува во соопштението.
Општината исто така информира дека огласот бр. 1/2026 за продажба на подвижни предмети – патничко моторно возило преку електронска аукција, е објавен и во Службен весник.
„Ги покануваме сите заинтересирани страни да учествуваат на аукцијата. На неа ќе бидат објавени сите информации за возилото, како и упатства за аплицирање“, соопштува Општина Струга.
Ауди А6, кој Општина Струга го купи за 67.000 евра во времето кога градоначалник беше Рамиз Мерко, предизвика дебата во јавноста поради набавката во период кога сметката на општината била блокирана. Против Мерко се водеше судски спор, но судот во Струга одлучи дека нема вина за купувањето на луксузното возило.