Грција итно распоредува батерија од моќниот противвоздушен систем „Патриот“ на островот Карпато, лоциран во југоисточниот дел на Егејското Море. Оваа одлука доаѓа како директен одговор на влошената безбедносна состојба по нападот со дрон врз британската база „РАФ Акротири“ на Кипар.
Освен ракетниот систем, Атина веќе активираше поширок пакет на воена поддршка за Кипар. Според најавите, кон островот се упатени грчки фрегати и борбени авиони од типот Ф-16.
Грчкиот министер за одбрана, Никос Дендиас, веќе е на пат кон Никозија, каде со кипарските власти ќе ги координира следните чекори за заштита на воздушниот простор во источниот Медитеран.
Нападот врз базата Акротири предизвика состојба на највисока тревога. По ударот на првиот дрон, биле пресретнати дополнителни летала, а во базата веднаш биле активирани сирените и воените авиони за пресретнување.