Српскиот министер за внатрешни работи, Ивица Дачиќ, е хоспитализиран на Клиниката за пулмологија во Белград поради тешка пневмонија. Неговата здравствена состојба е оценета како многу сериозна, а министерот е приклучен на апарати за механичка вентилација.
Заменик-директорот на Клиниката, Спасоје Попевиќ, потврди дека состојбата е критична, но моментално е постабилна во споредба со претходната ноќ. „Тој е сè уште во сериозна здравствена состојба. Борбата продолжува, тој е на механичка вентилација и во овој момент успеавме да ја стабилизираме неговата состојба“, изјави Попевиќ.
Лекарите нагласуваат дека во овој момент е прерано да се даваат какви било долгорочни прогнози. Претседателот на Србија, Александар Вучиќ, пред неговото заминување за Казахстан, го посетил Дачиќ во болницата. Вучиќ преку кратка изјава за медиумите пренесе дека здравствената состојба на министерот е „нешто подобра“.