Системот за видео надзор „Безбеден град“, кој ги покрива градските подрачја и клучните коридори, продолжува немилосрдно да ги бележи сообраќајните прекршоци. Во периодот од 16 до 22 февруари, камерите регистрирале вкупно 4.910 прекршоци.
Очекувано, апсолутен рекордер во статистиката е пречекорувањето на брзината. Дури 4.691 возач биле „уловени“ како возат побрзо од дозволеното. Покрај брзото возење, камерите детектирале и 203 возачи кои управувале возила со истечена сообраќајна дозвола, како и 16 случаи на минување на црвено светло.
Иако бројката на прекршоци е висока, податоците покажуваат дека системот почнува да влијае врз свеста на возачите. Изминатата седмица се изречени 117 мерки „забрана за управување со возило“ (одземање на возачката дозвола), што е значително помалку во споредба со почетокот на месецот.
Од овие 117 најтешки санкции, 16 се поради минување на црвено светло, додека 101 се за екстремно брзо возење.Загрижувачки е податокот дека 75 возачи возеле со над 80 км/ч над дозволеното во населено место, а седуммина „летале“ со над 170 км/ч на отворен пат. Министерството за внатрешни работи повторно апелира до граѓаните да ги почитуваат правилата за да се осигура безбедноста на патиштата.