Скопскиот градоначалник, Орце Ѓорѓиевски, информира дека поради неповолните временски услови, екипи се испратени на терен и реагираат навремено и координирано. Градоначалникот истовремено апелира на внимателност кај граѓаните.
Екипите се на терен и постапуваат со целосна мобилизација поради паднати и оштетени дрвја на повеќе локации низ градот како резултат на засилениот ветер. Нашите служби веднаш излегоа на терен за отстранување на опасностите и обезбедување безбедно движење, наведува Ѓорѓиевски на неговата Фејсбук-страница.
Ѓорѓиевски додава дека се сечат и расчистуваат паднатите дрвја, се отстрануваат скршените гранки и се нормализира сообраќајот таму каде што имало застој.
Приоритет ни е безбедноста на граѓаните и непреченото функционирање на градот. Апелирам до сите граѓани на зголемена внимателност додека траат активностите на терен. Продолжуваме посветено и одговорно, истакнува градоначалникот.