Сојузот на синдикатите на Македонија (ССМ) утре ја реализира последната од серијата најавени блокади, а овојпат на нивниот нишан е зградата на Владата. Точно во 11 часот, влезовите на „Илинденска“ ќе бидат блокирани со барање за итно зголемување на минималната плата на 600 евра и линеарно покачување на сите плати за 100 евра.
Претседателот на ССМ, Слободан Трендафилов, упати остри критики до власта и работодавачите, нагласувајќи дека македонскиот работник е премногу продуктивен за парите што ги добива.
„Падна и последниот аргумент дека работниците не биле продуктивни. Еден работник создава 290.000 денари капитал месечно, а добива само 24.379 денари минимална плата. Тоа се само 17 проценти од неговиот труд кој се слева во плата“, изјави Трендафилов.
Синдикатот појаснува дека потрошувачката кошничка е зголемена за над 9.000 денари, што ги прави четиричлените семејства секој ден посиромашни.