Протести се одржаа на улиците на Техеран и покрај прекинот на интернетот што во Иран трае повеќе од 24 часа и покрај заканувачките СМС-пораки упатени до граѓаните да не учествуваат во демонстрациите, објавува Би-Би-Си.
Според британскиот јавен сервис, неколку видеа од протестите одржани во четврток навечер прикажуваат луѓе облеани во крв како лежат на улиците на иранската престолнина. Би-Би-Си наведува дека тоа се првите снимки од Техеран што ги добиле по воведувањето на интернет-блокадата и дека на нив се гледаат демонстранти како скандираат антивладини пароли.
Очевидци изјавиле дека граѓаните во Иран добиваат заканувачки СМС-пораки од Корпусот на исламската револуционерна гарда (ИРГЦ) и од иранската полиција, со предупредувања да не се приклучуваат на протестите.
Очевидец од болница во јужен Иран изјавил дека дел од повредените демонстранти биле застрелани во главата, а дека голем број лица со тешки повреди биле примени на лекување.
Според извештаите и информациите што BBC Persian ги добил од различни градови, нивото на насилство за време на протестите било исклучително високо. Како резултат на тоа, голем број демонстранти биле повредени или убиени откако безбедносните сили отвориле оган врз нив.
Би-Би-Си објави дека добил две видеа за кои се тврди дека се од синоќешните протести во северниот ирански град Фардис. На снимките, наводно направени околу 21 часот, се гледаат лица погодени со боева муниција, а до десет луѓе лежат на земја, обилно крвавејќи.