Министерот за внатрешни работи, Панче Тошковски, најави сериозно заострување на казнената политика за нелегална трговија и употреба на пиротехника. Тој изрази незадоволство што и покрај превентивните кампањи, скопските улици се преплавени со петарди, а најави и чистка во сопствените редови по шокантното откритие во СВР Велес.
Министерот потврди дека полициски службеник бил дел од криминална група која нелегално внесувала и транспортирала пиротехнички средства во државата.
„Индициите и доказите до овој момент се во насока на она што е веќе споделено – дека полицискиот службеник учествувал во нелегални дејствија поврзани со внесување и транспорт на пиротехника. Мораме да ги санкционираме сите кои придонесуваат пиротехниката да заврши во рацете на дечињата“, дециден е Тошковски.
Тој потенцираше дека лично се залага за многу построги санкции за оние кои увезуваат и шверцуваат опасни средства, со цел да се спречат трајни повреди кај најмладите.