Претседателката Гордана Сиљановска Давкова истакна дека националниот консензус за евроинтеграциите треба да се гради околу гаранции дека нема да се поставуваат нови условувања за земјата.
„Консензус треба да има околу тоа дека не смее да има двојни стандарди за членството во ЕУ. Ние сме рекордери по уставни измени на барање на ЕУ, дури и името го сменивме без консензус, но не добивме ниту почеток на преговори. Консензус треба да има за тоа дека ако се повикуваме на принципи, тие треба да важат за сите. Ако Светот на Европа формирал суд за човекови права, пресудите треба да се спроведуваат“, рече Сиљановска Давкова во гостување на ТВ Канал 5.
Таа нагласи дека е неопходно да се добие гаранција дека нема да се отвораат расправи за идентитетски прашања, кои се темелна вредност на ЕУ.
„Националниот консензус треба да се изгради околу гаранциите. Мора да имаме некакви гаранции и има многу варијанти за нив. Не е точно дека не сме разговарале – сме разговарале. Нашиот преседан не е битен само за нас туку и за сите други кандидати за членство во ЕУ“, додаде претседателката.
Сиљановска Давкова посочи дека високи европски претставници истакнале дека се потребни гаранции и дека штитот на ветото треба да се урива, но предупреди дека дури и земјите од Западен Балкан кои се најбрзи во процесот, можат повторно да се соочат со вето.
Таа оцени дека претходната влада прифатило нешто што е спротивно на принципите и вредностите на ЕУ, како што е наведено во Преговарачката рамка и заклучоците на ЕУ.
„Кога читате извештаите и евалуациите, гледате дека за Зелената агенда сме вреднувани исто како Молдавија, но таа добива средства, а ние не. ЕУ мора да најде решение кое ќе обезбеди гаранции и безбедносни механизми за нас“, рече Сиљановска Давкова, додавајќи дека било која членка на ЕУ, третина од пратениците или Комисијата може да покрене постапка против Бугарија за кршење на основните принципи.
Претседателката заклучи дека ЕУ е практична и прагматична, но дека е важно да се обезбедат гаранции за Македонија во процесот на преговори, особено во контекст на мултиполарната и нестабилна меѓународна сцена.