Во судницата во Идризово денеска продолжи судењето за пожарот во дискотеката „Пулс“ во Кочани, во кој загинаа 63 лица, а над 200 беа повредени. Денешното рочиште, кое започна во 9:30 часот, продолжува со воведни зборови на одбраната на обвинетите претставници од Министерството за економија.
Судењето се одвива под засилени безбедносни мерки.
Одбраната на функционерите ги оспорува надлежностите
На вчерашното рочиште, одбраната на поранешните министри за економија и директори на Дирекцијата за заштита и спасување (ДЗС) негираа вина и го оспорија обвинението, тврдејќи дека немале законски надлежности или фактичка моќ да влијаат врз трагичниот исход.
- Крешник Бектеши (поранешен министер за економија): Одбраната тврди дека не постои причинско-последична врска во дејствијата на Бектеши и дека Министерството нема надлежност за инспекциски надзор. Тие посочија дека вистинското дејствие на извршување е пожарот предизвикан од пиротехника несоодветна за затворена просторија, користена спротивно на закон.
- Ваљон Сараќини (поранешен министер за економија): Одбраната изјави дека лиценцата на „Класик М“ од 2012 година не значела дозвола да обавува дејност на друга локација, да биде дискотека наместо кабаре, ниту да прима прекумерен број луѓе и да користи пиротехнички средства на недозволен начин.
- Аднан Џаферовски (поранешен директор на ДЗС): Неговата одбрана го оцени обвинението како правно погрешно и без факти, предупредувајќи дека „ниту еден системски пропуст не создава индивидуална кривична одговорност“. Џаферовски порача дека „совеста му е апсолутно чиста“.
- Шабан Салиу (поранешен директор на ДЗС): Изјави дека во периодот од 2012 до 2017 година во ДЗС никогаш не пристигнале документи со барање за согласност од кабаре „Пулс“.
Денеска воведен збор треба да даде одбраната на 26-то обвинетиот Шефкет Хазири од Министерството за економија, а преостануваат и одбраните на други претставници од Министерството, пазарни инспектори и сопственикот на агенцијата за обезбедување „Рубикон“, Александар Нацев.
Обвинителството, застапувано од тим од 15 јавни обвинители, најави дека доказите ќе покажат оти клубот „Пулс“ бил смртоносна стапица уште од самиот почеток, резултат на систематска негрижа и институционални пропусти.