Вицепремиерот и министер за транспорт Александар Николоски денеска изврши увид во два значајни проекти за железничкиот сообраќај – новата делница за товарен превоз Драчево-Илинден и првата фаза од градскиот воз.
Николоски појасни дека со новата делница, товарните возови повеќе нема да мораат да минуваат низ центарот на градот преку новата железничка станица.
„На увид сме на два значани проекти. Првиот кој што се однесува на товарниот превоз, нешто што е срцето на железничкиот сообраќај во Македонија… Со овој потег кој што почнува да се работи од Драчево ќе се оди дирекно Илинден, односно товарните возови нема веќе да има потреба или да ја одбегнуваат одбегнуваат оваа делница или да ја користат со мала брзина или најлошата варијанта да влегуваат и поминуваат низ центарот на градот односно преку новата железничка станица. На тој начин очекувам дека карго сообраќајот ќе се зголеми значително и многу“, појасни Николоски.
Вториот проект, како што рече министерот, е идејата за градски воз која полека станува реалност.
„Имаме три траси: првата оди од Зелениково преку Драчево и Јане Сандански, помеѓу Кисела Вода и Аеродром, и веќе се работи. Наредната година ќе почне и реализацијата на останатите две“, нагласи Николоски.
Тој потсети дека железничката инфраструктура што ја затекле е стара повеќе од половина век.
„Дрвените прагови што се заменуваат денес биле поставени меѓу 1963 и 1969 година и од тогаш не се сменети. Замислете во каква состојба ја наследивме државата, кога по толку години првпат се работи во 2024–2025 година“, истакна Николоски.