По катастрофалните изборни резултати, повеќе нема дилеми дека СДСМ е во целосен пад, велат од ВМРО-ДПМНЕ. Партијата е трета во државата и петта на ниво на Град Скопје, потенцираше на прес-конференција Викторија Андоновска.
Андоновска нагласи дека овој резултат не е случаен, туку е директна последица на раководството на СДСМ и Венко Филипче. Според неа, Филипче и натаму работи „под диригентската палка на Зоран Заев“.
„Филипче, наместо да ја реформира СДС, ја претвори партијата во негов приватен проект под влијание на Заев. Народот го препозна тоа и ги казни“, изјави Андоновска.
Таа ги повтори бројките од изборниот пораз: само шест освоени општини, едвај 126 илјади гласови и околу 230 советници, со што СДСМ го доживеа најголемиот изборен пораз во својата историја.
Од ВМРО-ДПМНЕ порачаа дека и по овие резултати, во СДСМ нема ниту реформи, ниту одговорност.
„Затоа, време е СДС да се соочи со вистината дека Филипче мора да си замине, партијата мора конечно да се дистанцира од Зоран Заев и да направи вистински реформи.“
Викторија Андоновска заклучи дека Македонија и ВМРО-ДПМНЕ мора да имаат опозиција која ќе биде конструктивна и одговорна, а не „арогантна и деструктивна партија која мисли само на личните интереси.“