Нигериската влада денеска соопшти за големи промени во врвот на војската, сменувајќи го началникот на Генералштабот, како и началниците на копнените, морските и воздушните сили.
Одлуката дојде помалку од една недела откако локалните медиуми објавија сомневања дека е направен обид за неуспешен државен удар за соборување на претседателот Бола Тинубу, што владата и војската официјално го негираа.
„Одобрив промени во хиерархијата на нашите вооружени сили за понатамошно зајакнување на националната безбедносна архитектура на Нигерија“, изјави претседателот Бола Тинубу во соопштението.
Генералот Олуфеми Олуједе, од Југозападна Нигерија, родното место на претседателот Тинубу, е назначен за началник на Генералштабот менувајќи го генералот Кристофер Муса.
Генералот Кристофер Муса беше назначен за началник на Генералштабот во 2023 година и надгледуваше неколку самити на високо ниво во Абуџа, главниот град, собирајќи воени претставници од Западна Африка и континентот.
Во последните 16 години, Нигерија се соочуваше со постојан екстремистички бунт на североистокот на земјата, предводен од Боко Харам и неговата одметната гранка, Исламска држава во Западна Африка.
Иако насилството се намали во однос на својот пик пред една деценија, конфликтот сè уште беснее во руралните области на земјата, а експертите предупредуваат на можно повторно појавување на екстремистички напади оваа година.
Нигериската армија е мобилизирана на неколку фронтови, борејќи се и против вооружени банди наречени „бандити“ на североисток, како и против сепаратистички групи на југоисток.
Безбедносниот аналитичар од Лагос, Конфидент Макери, смета дека промените во военото раководство се нормална и редовна постапка во Нигерија. Но, во исто време, тој додаде дека армијата не успеала убедливо да ги негира претпоставките за државниот удар.
„Значи, оваа реконструкција е можеби начин да се искоси тревата од под нозете на заговорниците“, рече тој.
Минатиот викенд, нигериските медиуми објавија дека најмалку 16 офицери планирале да го соборат претседателот Тинубу. Армијата претходно овој месец објави дека 16 офицери се уапсени поради „дисциплински проблеми“.