Според американскиот претседател Доналд Трамп, турскиот претседател Реџеп Таип Ердоган би можел да биде корисен во посредувањето за окончавање на конфликтот меѓу Москва и Киев, бидејќи ужива почит во Русија.
„Русија го почитува. Украина, не можам да ви кажам за Украина, но (рускиот претседател Владимир) Путин го почитува“, изјави Трамп пред новинарите во „Ер Форс Уан“ минатата ноќ, додека патуваше од Египет кон Вашингтон.
Претседателот на САД ги сподели овие забелешки откако успешно интервенираше за да се постигне договор за прекин на огнот меѓу Израел и Хамас, посочувајќи дека неговиот тим сега ќе се насочи кон ставање крај на војната во Украина.
Трамп изјави дека се согласува со „оние кои се тешки“, алудирајќи на Ердоган и потенцирајќи дека другите лидери на НАТО често бараат од американскиот претседател да посредува во нивните несогласувања со Анкара.
Претходно вчера, Трамп и Ердоган се сретнаа во Шарм ел Шеик, каде што им се придружија лидерите на Катар и Египет во потпишувањето на мировниот договор за Газа како посредници.
Турција, членка на НАТО која честопати има недоразбирања со други сојузници, исто така се позиционира како посредник во војната меѓу Русија и Украина, одржувајќи блиска економска и политичка соработка со Москва, додека истовремено го снабдува Киев со воена опрема.
Истанбул беше домаќин на три рунди руско-украински мировни разговори во текот на оваа година, кои резултираа со нови договори за размена на затвореници, како и неуспешни првични преговори за спречување на целосна војна во 2022 година.
Дополнително, Ердоган помогна во преговорите за договорот за жито од Црното Море во 2022 година, кој овозможи извоз на украински земјоделски производи и покрај тековните непријателства.