Македонската берза ја организира 25-тата, јубилејна годишна конференција, чиј работен дел ќе се одржи денеска и утре во Охрид.
Од Македонската берза велат дека годишната конференција е еден од најзначајните финансиски настани во земјава и претставува платформа за поврзување, размена на знаења и искуства, како и дискусија за актуелните случувања на пазарот на капитал во Македонија и регионот.
На минатогодишната конференција учествуваа околу 30 говорници и панелисти, а присуствуваа повеќе од 240 учесници.
Од Берзата информираат дека и годинава е подготвена разновидна програма со повеќе говорници и теми, меѓу кои развојот на пазарите на капитал, финансирањето на растот и развојот на компаниите, алтернативните извори на финансирање, меѓународните искуства и најдобрите практики.
На конференцијата ќе се дискутира и за банкарството, инвестирањето и финансиските институции, како и за дигиталната трансформација, вештачката интелигенција и новите финансиски технологии.