Измамиле жена од Штип, ѝ ги прибавиле личните податоци, па во нејзино име аплицирале за седум потрошувачки кредити во седум различни финансиски друштва.
Ова е само првиот дел од измамата. Како што соопшти МВР, откако ги добиле парите од кредитите во вкупен износ од 227.500 денари, тие продолжиле.
46-годишна жена од Велес, која е второпријавена, неовластено ги обезбедила и податоците од банкарската картичка на жртвата. Потоа, од банкомати во Велес и Штип, таа извршила 11 успешни трансакции и подигнала уште 214.000 денари.
СВР Штип поднесе кривична пријава против П.С.(34) од Струга, кој е осуденик во затворот Идризово, и Т.К.(46) од Велес.
Според пријавата, тие се осомничени за кривични дела „измама“ и „злоупотреба на лични податоци“, додека Т.К. дополнително е пријавена и за „оштетување и неовластено навлегување во компјутерски систем“. Измамата се случувала во текот на април и мај 2025 година.