Украинскиот претседател Володимир Зеленски предупреди дека постои голема веројатност Русија да изврши масовен напад со ракети и беспилотни летала во текот на ноќта, по неколкудневни подготовки.
Зеленски ги објави овие информации на својот официјален канал на Телеграм, повикувајќи ги жителите на сите региони внимателно да ги следат предупредувањата за воздушна закана.
- Добив извештај од командантот на воздухопловните сили Анатолиј Кривоножко. Русите веќе неколку дена се подготвуваат за масовен напад, а постои голема веројатност дека тој ќе биде извршен вечерва, напиша Зеленски.
Украинскиот претседател нагласи дека е од клучно значење меѓународните партнери целосно да ја разберат моменталната ситуација на теренот, истакнувајќи дека нивната подготвеност да обезбедат дополнителни ракети за воздушна одбрана директно влијае врз заштитата на цивилното население.
- Важно е нашите партнери целосно да разберат што се случува и дека заштитата на животите директно зависи од нивната подготвеност, или неподготвеност, да ни помогнат со ракети за воздушна одбрана. Ова се однесува првенствено на Соединетите Американски Држави и оние партнери кои имаат ракети „Патриот“ и можат да ги обезбедат за да ја поддржат нашата одбрана, рече тој.