Зеленски: Украина ќе издржи и ќе победи

Претседателот Володимир Зеленски денеска по повод Денот на достоинството и слободата на Украина изјави дека „земјата ќе издржи и ќе победи“.

Денот на достоинството и слободата беше воведен како комеморација на проевропските протести од 2013/2014 година, пренесува „Ројтерс“.

Зеленски рече дека во иднина Украинците ќе се собираат на плоштадот на независноста во Киев, кој беше централен за настаните од 2013/14 година, каде што ќе го прослави Денот на победата на Украина „во мирен Киев, во мирна Украина“.

Тој ги поздрави придонесите на своите сограѓани, од војници, пожарникари и медицински лица до наставници кои држат часови преку интернет, селани кои готват за војската, кројачи кои шијат униформи и земјоделци кои ги обработуваат своите ниви и покрај ризикот.

Зеленски им честиташе на Украинците за нивниот пркос пред честите ракетни напади, широкото уништување, недостигот и постојаните прекини на струја.

„Можеме да останеме без пари. Нема бензин. Нема топла вода. Нема светлина. Но не без слобода“, рече Зеленски за време на своето обраќање до сонародниците.