Заев - Пенс: Со Договорот го обезбедуваме заслуженото место во евроатлантските структури

 

Пораки на охрабрување за Преспанскиот договор доби денеска премиерот Зоран Заев од потпретседателот на САД Мајк Пенс на средбата во Вашингтон.

По состанокот, Пенс на „твитер“ напиша дека Вашингтон дава силна поддршка на, како што нагласува, историскиот Договор со Грција. 

- Спроведувањето на овој Договор ќе обезбеди поголема сигурност во регионот, наведува Пенс. 

Премиерот Заев, пак, на својата фејсбук страница, пренесува дека Пенс ги поздравил  одговорноста и одлучноста при постигнувањето на Договорот.

 

- Можноста да разговараме со потпретседателот на САД Мајк Пенс  доаѓа во клучен историски момент за Република Македонија. Од потпретседателот Пенс добивме пораки на охрабрување за одговорноста и одлучноста при постигнувањето на договорот од Преспа. На средбата беше истакнато дека со Договорот го обезбедуваме заслуженото место во евроатлантските структури. Со тоа го осигуруваме мирот, стабилноста и просперитетот за нашите граѓани, напиша Заев. 

Прес-службата на Владата на РМ вечерва соопшти дека Пенс на средбата со Заев пренесе пораки и од претседателот на САД Трамп за поддршката на Вашингтон за покажаната храброст и лидерство за спроведување на неопходните реформи во земјата и за постигнатиот Договор со Грција што го отворија патот за членството на Република Македонија во НАТО и ЕУ.

- Потпретседателот Пенс нагласи дека Белата куќа ја охрабрува и ја споделува визијата на Република Македонија да биде демократска, просперитетна земја членка на НАТО и ЕУ, информираат од Владата.

Во текот на разговорот, премиерот Заев рече дека Македонија нема алтернатива за интеграцијата во ЕУ и НАТО и дека граѓаните препознаваат дека од нивната одлука на референдумот поканата за НАТО што ја добивме во Брисел ќе се преточи во протокол за пристапување и процес за ратификација на нашето пристапување во јануари 2019 година.

 

Според него, столчето во НАТО кое значи рамноправно учество во работата на Советот на алијансата и безбедност и стабилност  уште на почетокот на идната година го прифаќаме заедно со одговорноста одбранбените стандарди да ги усогласуваме со оние на НАТО.

- Охрабрени и инспирирани од средбата со потпретседателот Пенс, остануваме во тесна соработка со САД во исполнувањето на нашата стратешка цел, да ги консолидираме евроатлантските структури за мир, стабилност и просперитет на сите нации кои се дел од истото семејство, рече премиерот на средбата. 

Според владината прес-служба, станало збор и за можноста заеднички да биде прославен приемот на Македонија во НАТО наредната година.

 

Средбата во Вашингтон се реализира на покана на потпретседателот Пенс, а следува по посетите на американскиот секретар за одбрана Џејмс Матис и на помошникот државен секретар Вес Мичел на Македонија и искажаната поддршка за претстојниот референдум и интеграцијата на земјата во НАТО и ЕУ. 

 

 

 

20.09.2018 - 22:20

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега