Вработените во одбраната речиси два месеци без здравствено осигурување

Речиси два месеци војниците и вработените во АРМ биле без здравствено осигуривање, пренесува Сител.

„Не сме здравствено осигурени од 01 декември 2020 година до вчера, денеска е се уште работен ден. Значи невозможно е, ние сме примиле плата во декември и јануари а немаме здравствено. Тоа го увидовме кога по реакција на нашите членови кои заминале дали заради себе или за својата фамилија на лекар и таму се изненадени дека државна институција како што е Министерството за одбрана има забрана за здравствено осигурување“, вели Ристо Ајтов, Претседател на синдикат на одбрана и безбедност.

Денес напладне тие добиле зелено светло од Фондот за здравство, а од Министерството негираат дека нивните вработени немале здравство 50 дена и велат дека се работело за еден ден, односно проблемот се појавил денес.

„Од Фондот, Министерството беше известено дека здравственото осигурување (само денес) е прекинато заради тоа што во нивниот информатички систем се јавува лице за кое не е платен придонес за здравствено осигурување за месец октомври 2020 година. Проблемот е решен и здравственото на вработените во Министерството за одбрана е активирано во 12:30 часот“.