Официјалните економски показатели на Државниот завод за статистика потврдуваат сериозно заживување на домашното стопанство и континуиран раст во индустрискиот сектор, уверува владејачката ВМРО-ДПМНЕ.
Бројките, според нив, покажуваат видливо раздвижување на терен каде зголемениот индустриски промет директно влијае врз отворањето нови работни места ширум земјата.
Од владејачката ВМРО-ДПМНЕ посочуваат дека економските мерки веќе се преточени во реални и опипливи резултати за менаџерите и работниците:
„Официјалните податоци на Државниот завод за статистика покажуваат дека индустриското производство во 2026 година бележи раст од 7,6% во однос на 2025 година, при што целокупната економска активност останува во позитивна зона, со раст од 0,2%. Ова е резултатот на економските политики на Владата, насочени кон конкретна и реална поддршка на домашните компании.“
Како главен двигател на овој економски развој и натамошното зголемување на извозот се издвојува конкретен индустриски сегмент.
Партијата на власт нагласува дека создавањето на соодветни услови за работа е клучниот фактор што им овозможува на фирмите да освојуваат странски пазари:
„Носител на овој раст е преработувачката индустрија, секторот кој создава најголема додадена вредност… Домашните компании имаат капацитет да растат, да вработуваат и да освојуваат нови пазари, кога им се обезбедени соодветни услови за работа.“
Најавено е дека поддршката за македонските компании и работници ќе продолжи со исто темпо со цел да се осигура повисок животен стандард и стабилност.