(Видео) Шанса за Центар: Нема празници за сечачите на Водно

На 31 декември, на часови пред Нова Година, инвеститорите не мируваат. Утрово работници почнуваат да ги сечат дрвјата на првата парцела на Водно за која е издадена градежна дозвола, соопштија од Шанса за Центар.

Велат дека граѓаните од улицата „Питу Гули“ се вчудоневидени од итањето да се почнат работите на парцелата иако почнуваат празниците.

„Вчера Советот на Општина Центар едногласно ја задолжи општината и градоначалникот да побараат вонреден инспекциски надзор на целото ова подрачје од Државниот инспекторат за градежништво и урбанизам. Како образложение се изнесоа бројните дописи од граѓаните од улица Козара, од улица Питу Гули и од улица Салвадор Аљенде за спроведување на овој Детален урбанистички план. Денеска е повикан и Државниот инспекторат за животна средина да направи увид во тоа што се сече и дали за тоа има дозвола“, се истакнува во нивната писмена реакција.

Две локации на кои се бара вонреден надзор од градежниот инспекторат се за новопроектирани улици, кои ќе овозможат пристап до парцели за градење кои сериозно ќе навлезат во шумата на Водно, а сите ние ќе изгубиме зеленило кое не штити од поплави, ерозии и загадување, објаснуваат од Шанса за Центар. Потсетуваат дека се работи за улици кои би воделе меѓу другите и кон целото подрачје со плацовите кои се дел од активниот судски случај во јавноста познат како „Плацови на Водно“.

„На други места се направени плански решенија, но врз основа на погрешни влезни податоци, како на пример во планот улица Козара е обележана како улица со ширина девет метри, а реално на терен е измерена дека е шест метри. Овие грешки може да се ненамерни, но и намерни, а со цел да се оствари корист на малкумина за поголем габарит на градби, со што штета би се нанела на многу соседи, граѓани и објекти на локациите“, се додава во напишаното.

Шанса за Центар бара планот кој овозможува корист за малкумина, а штета на многумина, со помош Државниот инспекторат за градежништво и урбанизам да биде стопиран за понатамошна реализација. За овој план деновиве јавноста е добро запознаена преку медиумските извештаи за заградувањето на плацовите на Водно каде што е планирано да се гради станбена зграда и пристатпен пат кој ќе води длабоко во шумата и ќе им одземе и дел од дворовите на жителите, велат од таму.

Шумата, како што потенцираат е богатство на сите и заштита на целиот град од порои и загадување на воздухот и мора да се одбрани. Време е, како што подвлекуваат, да се повлече линија и да се заштити заедничкиот интерес и квалитетот на животот на граѓаните пред налетот на моќниците.