Противвоздушните и противракетните сили на НАТО, стационирани во Источниот Медитеран, успешно неутрализираа иранска балистичка ракета насочена кон турскиот воздушен простор. Според информациите од турското Министерство за национална одбрана, ракетата била лансирана од Иран и прелетала преку териториите на Ирак и Сирија пред да биде соборена.
MSB: "Türk hava sahasına yöneldiği tespit edilen balistik mühimmat etkisiz hale getirildi" pic.twitter.com/aWHuwep5jg
— İhlas Haber Ajansı (@ihacomtr) March 4, 2026
Операцијата за пресретнување се случила во близина на турската граница, над градот Камишли во североисточна Сирија. Остатоците од пресретнувачката ракета паднале во округот Дортјол, во покраината Хатај, но за среќа не предизвикале жртви ниту повредени. Турските власти појаснија дека пронајдените делови на земјата му припаѓаат на одбранбениот систем, а не на иранскиот проектил, кој бил целосно уништен во воздух.
По инцидентот, официјална Анкара упати остра порака:
„Ве потсетуваме дека го задржуваме правото да одговориме на секој непријателски чин против нашата земја. Ги повикуваме сите страни да се воздржат од потези што дополнително би го прошириле конфликтот во регионот.“
Турскиот министер за надворешни работи, Хакан Фидан, веднаш стапил во контакт со својот ирански колега, Абас Аракчи, пренесувајќи му дека ескалацијата е неприфатлива. Поддршката за Турција пристигна и од НАТО, од каде портпаролката Алисон Харт изјави:
„НАТО цврсто стои зад сите сојузници, вклучително и Турција, додека Иран продолжува со своите неселективни напади низ регионот. Нашата одвраќачка и одбранбена позиција остануваат силни во сите домени.“