Утрово грчки авиони прелетуваат на небото над Македонија

Со два прелета во воздушниот простор на Македонија изутринава од 7:30 до 9:30 часот се изврши првиот пробен прелет за потребите на НАТО мисијата „Air Policing“ (чување на воздушниот простор). Прелетот го извршија воздухоплови на вооружените сили на Република Грција.

Целта на прелетот е проверка на комуникациите и радарската покриеност на нашиот воздухопловен простор.

 

Ова беше договорено при посетата на грчкиот премиер, Алексис Ципрас, во април, кога со премеирот, Зоран Заев, потпишаа меморандум со кој се предвидува грчката авијација да го покрива небото над Македонија. Како што рекоа тогаш двајцата премиери ова би ја зголемило безбедноста и соработката.

„Прелетите се во функција на подготовката и исполнувањето на условите од страна на Македонија во делот на воздухопловството како идна рамноправна членка во системот на колективна безбедност“, соопшти Министерството за одбрана.

Мисијата „Air Policing“ е мирновремена задача на НАТО, која вклучува користење на системот за следење на воздушниот простор и управување со системот за команда и контрола на воздухопловните сили со соодветни сили и средства за противвоздушна одбрана, со цел заштита на воздушниот простор на земјите членки на НАТО.

 

 

 

Добивајте вести на Viber

21.05.2019 - 10:25

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега