Судењето за Меѓународен сојуз продолжува откако Боки и Ременски побараа изземање на Русковска

Во Основниот кривичен суд во Скопје, за денеска е закажано ново судско рочиште за предметот кој се однесува на невладината организација Меѓународен сојуз – Скопје, на Бојан Јовановски – Боки 13.

Ова ќе биде втор обид за старт на судскиот процес, откако првото рочиште на 1 јули беше одложено поради барање за изземање на обвинителката Вилма Русковска од овој предмет.

Судскиот процес го води судечки совет составен од двајца поротници и судијката Софче Гаврилова-Ефремова која беше втора судијка и во случајот „Рекет“.

Во овој предмет обвинителството тврди дека двајца бизнисмени биле доведени во заблуда и измамени преку проекти за изградба на европски центар за возрасни лица и мобилни сервиси, па преку Македонската авторска агенција исплатиле речиси еден милион евра, едниот сума од 719.905, а другиот 233.821 евра. За Јовановски ова се небулозни тврдења на обвинителството и уште еден конструиран случај.

Во случајот „Рекет“ Боки-13 е осуден на девет години затвор за делата примање награда за противзаконито влијание и за перење пари, а поранешната специјална обвинителка Катица Јанева на седум години затвор за злоупотреба на службената положба и овластување.